Xəmən
Çəsədəli yolən, rukən pebedən,
Jenon-merdon həmmə bə xəmən şedən.
Darzon vardən xəmənədə ekardən,
Pebıredən, peyoş molon pekardən.
Darzon peyo çan sahat molon qardən,
Oqonedən, vıjəy zıvon bekardən.
"Ho-ho" kardən, molon romdən de vanqi,
Peqordnedən xəməni de bolanqi.
Çı xəməni kənon kali dərıtdən,
Kali jenon xəməno sıli rıtdən.
Kıləş-puşi de bolanqi beğandən,
Bə vo doydən, ıştəni sof oğandən.
Sıs omedən, hiç vindənin rohəti,
Xəmən kardən de ve yolə zəhməti.
Maşinış sə ısət çəmə kolxozi,
Rəxə divoj, çəyku ve mandə rozi.
Maşin rəyrə darzon xəmən kardedə,
Kıləş-puşi bə kəno bekardedə.
Ruj ki bə tojə obedə,
Sıbi kijon cə-cə jedə.
Kə xıyzon həmmə pebedə,
Xosə moəm bə tuk şedə.
Tankardə tukə oləton,
Tunukə de dasıvonon.
Peşo qofe bə sə noydə,
Şinə moəm bə tuk şedə.
Damedə bəy tuki olət,
Dasonədəş çokə ğıvət.
Bə pəhlivoni oşedə,
Şinə moəm bə tuk şedə.
Jenon həmmə dasə-dasə
Ha ruj beşdən bə tukəsə.
Məzə bənə vəyə bedə,
Xosə moəm bə tuk şedə.
Həmmə tanka i ranq olət,
Lekonədə votdən sıbət.
Qılə-qılə donə jedə,
Şinə moəm bə tuk şedə.