ÇƏMƏ TOLIŞƏ BANDON
Təpə jə bə osmoni,
Oqətdəş əçəy qoni.
Bə vəjd vardedəş mıni,
Hırinə vişə bandon,
Çəmə Tolışə bandon.
Har hal qılə əsqəre,
Har də qılə sənqəre.
Çimənonış məxməre,
Sımbılə huşə bandon,
Çəmə Tolışə bandon.
Bəhi-puton ğıy jedən,
Çanqi bə hal ejedən,
Sığon bə də rıjedən,
Şırnəon peşə bandon,
Çəmə Tolışə bandon.
Vey merdon ğeyrətiku,
Detı dust- ulfətiku,
Qeşə məhəbbətiku
Bətı ğıbon şə bandon,
Çəmə Tolışə bandon.
Azərboycon ıştı mo,
Səvolon bə bətı bo,
De səbəbi çəy hejo
Ğeyrəti kəşə bandon,
Çəmə Tolışə bandon.
Səçon
Tolışə poeziya antoloqiya (2021), 75–76. ISBN 978-9952-28-569-7.