VİNDƏ XIDO PİYO, DINYO
Çaşi okə, luti bıvind,
Lo vindedəş, puti bıvind,
Duzi duze, şati bıvind,
Vində Xıdo piyo, dınyo.
Kəsi nişe, kəsi heste,
Çənə odəm şıl-şıkəste,
Çəmə zulm bəmə vəste,
Vində Xıdo piyo, dınyo.
Çı nomerdi məydoniş tı,
Bo səğıri divoniş tı,
Bo yətimi zindoniş tı,
Vində Xıdo piyo, dınyo.
Qemıj qındə, sard omedə,
Bəlo omdə, dard omedə,
Bəji şedə, mard omedə,
Vində Xıdo piyo, dınyo.
Ənə qıno kardəkəson,
Xəlxi həxi hardəkəson,
Maskə jiyo qardəkəson,
Vində Xıdo piyo, dınyo.
Səçon
Tolışə poeziya antoloqiya (2021), 196–197. ISBN 978-9952-28-569-7.