SİNƏM IŞTI ROY BƏ ÇƏŞE

Lınqi mənə zəminisə, Bəştı lınqi teğ ebəşe. Bınəv çımı bı sinədə Ta çımı con kenə beşe, Sinəm ıştı roy bə çəşe. Tıni vindəm, az lol bedəm. Noxəş bedəm, behol bedəm. Bənə xıçə xol-xol bedəm. Dılım poş be, sute-vəşe. Sinəm ıştı roy bə çəşe. Har lıputı qıləy ğənde, Dimı bənəy sə çəğınde. Mın bı bəlo ki eğande? Əloc bıkə, conım beşe, Sinəm ıştı roy bə çəşe. Zinə cıvon, ımruj sinnin. Çokə rujon dəvardin, şin. Sadıxi yod çiçon dəşin? Çımı dəmon ıştı çəşe. Sinəm ıştı roy bə çəşe!