TOLIŞƏ KİNƏ
Xonçə boği vıliş tı,
Çimənisə qıliş tı.
Betı nəfəs əkəşnim,
Çımı çaşiş, dıliş tı.
Az bıqardom bəştı sə,
Çimənisə, daştisə.
Mıni çaşkə boğədə,
Saat qardəy həştisə.
Çaşon siyo, bəv oşım,
Məmandəmon dıvrədə.
Çımı lampə bıvoşın,
Bıvəşəmon ivrədə.
Siyo aspi nal bəbe,
Sipyə dimi xol bəbe.
Bılbıl tıni bıvindo,
Vıli tono lol bəbe.
Tı dəvlətiş, tı moliş,
Məmləkətiş, məholiş.
Iştı sinə dı dınyo,
İ dınyosə ve boliş.
Az bıqardom bəştı sə,
Çimənisə, daştisə.
Mıni çaşkə boğədə,
Saat qardəy həştisə.
Səçon
Tolışə poeziya antoloqiya (2021), 23–24. ISBN 978-9952-28-569-7.