ÇIMI BALƏ, BƏ SƏ DƏŞİ

Dılonədə rəhm orəxə, Mardəkəsi votdən rəxə, Çı fikiku dılon pıxə, Ko kardəni kəş bo kəşi, Çımı balə bə sə dəşi. Takə bəştə tani olət, Məkə zono,kulət-kulət, Mahaşt bəştə nezi ğələt, Ğıymət bınə bəştə ləşi, Çımı balə,bə sə dəşi. Məvo bəştə yoli dimi, Marışt çəvon dılon simi, Mahaşt bə nez,dardı-gəmi, Bıqət çəvon dıynən kəşi, Çımı balə,bə sə dəşi. Məvot həni,sinım veye, Be yol ıştı dınyo təye, Yoli dıvo botı kəye, Əve botı Ovşım,Həşi, Çımı balə,bə sə dəşi. Məvot jen çı yadi kinəy, Iştı doğmə əğli inəy, Imruj moye,maştə nənəy, Əv bədo ov,bıbuş təşi, Çımı balə,bə sə dəşi. Bızın vırə yolı-ruki, Hərom məhə,bıkə çoki, Oxoy bəşemon ji xoki, Melon bahan çəmə nəşi, Çımı balə,bə sə dəşi. Həmə bıznon ımi bəpe, Dınyo qıləy qırdə ləpe, Qordındə əməni səpe, Kenəş pıdə,qətdə quşi, Çımı balə,bə sə dəşi.