SEF
Sef hardəkəsi cone,
Jıbızın, xomə şone.
Bə sefə do diə kardən,
Sori dırozi hardən.
Sef heste, xırçə sefe,
Çəy hardəkəsi kefe.
Xavloə sef harde pidə,
Qəvədə orızedə.
Sıə sefi vırəş coy,
Təmiz de ğəndi icoy.
Kusef tikəy meyxoşe.
Vırəş çəmə Tolışe.
Telə sef jəqo vəc ni,
Bo sefçəqi bevəc ni.
Tırşə sef məhə sıftə
Bəbeş ləzzətdə, kefdə.
Əqər sef pidə harde,
Binokə telə varde,
Əvoni ğələm bıkə.
Iştə soədə cəm bıkə.
Səçon
Tolışə poeziya antoloqiya (2021), 28–29. ISBN 978-9952-28-569-7.