DAMEDƏM

Tolışi mohol çı ğəşənqe, vəşte, Oxo hıtə bəxtım oğo be, əşde, Osmonədə qədə astvəmən vaşde. Kefim saze, bənə podşoh nəvedəm, Im xəlx bəmı, az bə xəlxe damedəm. Məmur bim az ve moholdə i cınqır, Noşukuron həmə beşin bə ğır-ğır, Mavji, mınim həromzodə,həm dılğır. İnsof iyo,imon iyo, şo bedəm, Im xəlx bəmı, az bə xəlxe damedəm. Az məmurim çı hukməti odəmim, Joqo bızın bo vəzifə mardəbim, Az hokimim, ve ixtiyor sohibim. Ğanuni bə har cürə ranq dənodəm, Im xəlx bəmı, az bə xəlxe damedəm. Tolışi xəlx, ve sakite, məlole, Im bə çəvon insoniəti dəlole, Moli hardəm,ve şine, lap həlole. Ov peşomdəm, qəv-lıputi moledəm, Im xəlx bəmı, az bə xəlxe damedəm. Ro-rizon, ve məktəbon xərobən, Hırdəyonən təhsiliku diyərobən, Ko kardəyon bə Urusət dərobən. Meydon çımı, bala-bala handedəm, Im xəlx bəmı, az bə xəlxe damedəm. Millətiro tikəy zəhmət kəşdənim, Şikoyət ni, qləy sədo məstənim, Lap xamuşin, beməxon sərəstənin. Im kəxobon çoknəy lozim qordnedəm, Im xəlx bəmı, az bə xəlxe damedəm. Təbiəti, havzə boğon ancedəm, Palmə, xımo, karlikə do kaşdedəm, Bə valyutə peqordnidəm, çanq jedəm. Im zəmini bəki pidəm pamedəm, Im xəlx bəmı, az bə xəlxe damedəm. Ve rohətim, çıvon nənə bovnedəm, Zülm kardəm,çıvon dıli tovnedəm, Lıvedənin, bənə pəsi çovnedəm. Şukr kardən bəşdə Xıdo, bəmedən, Im xəlx bəmı, az bə xəlxe damedəm. Lap pentono nışdəkəson dovnedəm, Ki norozi, kəybə-kəybə novnedəm, Qəvə-qulə kardəkəson tojnedəm. Heç tarsım ni, hərbə-zorbən omedəm, Im xəlx bəmı, az bə xəlxe damedəm. İnşo bakam bı moholdə imorət, Detoba oxo az podoşom,həzorət, Devran çımı, həm ziyorət-ticorət. Bo sərvəti az con doydəm, mardedəm Im xəlx bəmı, az bə xəlxe damedəm.