VOŞ

Hışk be toğon, boy vəse, Oqardin bə ləvo, voş. Kəfşən, məzə sə mıse, Emi, bıkə kavu, voş! Bə doon rəği nəm doydəş, Bəçəy mivon təm doydəş, Nıvoş, bəvon ğəm doydəş, Çəvon coniş, bıvo, voş! Voydəş, voydəş zomsono, Hiç çidəniş tovsono. Ha nəvedəş osmono, Osmonədə evo, voş! Dastəvo voy-voy kardə, Aləfon boy-boy kardə, Çimənon şovoy kardə, Kəynə bedə həvo voş. Peton avə qıl jəydə, Çı band-bə band qəl jəydə, Jiton çəmə dıl jəydə, Tıniş həməy dəvo, voş! Bə qit qınyə şığən dəy, Vıl obəkə teğən dəy, Kavu bəbe sığən dəy, Əqər boş bə rəvo voş!