BƏHRİ-TƏVİL

“Əy fələk, zulmı əyone, çıcurə devru-zəmone, dılımon lap təylə xune, əməni məsut, əmone, çəmə ko həmməysə qone...” (Mirzə Ələkbər Sabir) Sahondə bor jedəmon, pəl jedəmon, kandedəmon, ter jedəmon, kaştedəmon, ov dodəmon, iqlə sıxan: anqulunsə vaşte-vaşte con dodəmon... Tosə bə vaxti ki, məhsul beşedə, pəydo bedə ve odəmon: moləvonon, berğəderon, anbardoron, boxalteron, hesobdoron, direktoron, əğrənomon, partkomon, injeneron, iqlə sıxan: zor odəmon, zır odəmon, dız odəmon... Fəhlə həxi hardəkəson, bəçəy hisob qardəkəson, dərizedən bə məhsuli, oşko-xəlvət dızedən ın məhsuli, co kardedən rəsəy-koli, hardən bənə dədə moli, baş kardedən həmə puli, sıftə boştə bardedən cəmə puli, çokə puli bə dast vardən, bə şəv hardən, bə ruj hardən, kənyək jedən, mehmon vardən, mehmon kardən, əlğərəz, bəştə çokə qolloğ kardən... Hələ dimiən si bedənin: manqə pulon duz dodənin. Çəvədən qətdən: səyuz puli, qəzet puli, kəsser puli, donə puli, nəloğ puli, həloğ puli, bilet puli, moğnə puli, ruşnə puli, ğazə puli, radio puli, telfon puli, həni çı bızınım çiçə puli- valla, dodəm az ımoni, mandəm deştə təylə coni... Isət bovıtən az çiç bıkəm, kovrə xoki bə sə ekəm, ıştə balon çoknə yolkəm?.. Ənnəhoyət, yolon vote: şoyvo bıkən, oməy həni perestroykə, ıştə çəşon dıynən okən, iclas bıkən, oşko bıkən, ıştə həxi tələb bıkən, tənğıd bıkən, rısvo bıkən, nifin bıkən, nalə bıkən, bıdə dızdon həyo bıkən... Penc sore ki, şedə perestroykə, sə bedəni məkə-bıkə, ğandəşone məxloği kə, ruənbə təlon, qujdbə təlon, çaybə təlon, ordə təlon, dəvo təlon, iqdə mandə ovən təlon... Hələ obən kəprətivon, dızdonşon doə sədr bəvon, jəydən bəmə zorə kıvon, piçat çəvon, bina çəvon, ğanun çəvon, fəhlə çəvon, ğəzənc çəvon— həmmə çəvon, boəmə mandə hozoə dardon... İyo tolış çokən votdə: – Bıjən-bıjən do pevatdə, Kosib ıştə hanı-hıtdə, Dızdon həmmə hərəkətdə...