TOLIŞƏ MAHNEON

Az aşığim zərdəbə, Ro şedə bə Zardəbə. Az ıştınim, tı çımı, Çəmə sıxan kardə bə. Az aşığim, bı bandi, Çı bandiku bə bandi. Marde heste, qarde ni, Tıniş çımı pəvandi. Honi roysə vılim az, Tojə çımən, qılim az. Çımı boği boğboniş, Çə boği boğbonim az. Tı xanımiş bə boli, Məmləkəti, məholi. Tıni ki to bəqəte, De ceyroni, məroli. Barzəbolo, siyo çaş, Zoon dıli toknedəş. Xıdo bəzne, tı kenə, Çıki lampə bəvoşneş. Dınyo bədo itkə kam, Tıni dəqiş nibəkam. Maqi roysə bınıştoş, Vəyo tıni çaş bəkam. Şəv-ruj xıvət hardedəm, Bəji bedəm, mardedəm. Tıni berdəm vindeədə, Iştəni qin kardedəm. Iştı sinə mərməre, Dimonı sıə məxməre. Çıki lampə bəvoşneş, Çəy siyo sığ qovhəre. Tıni vinde, əy tobə, Nə qınoye, nə tobə. Tokyə şəvon oşımiş, Oşməşəvon astovə. Mol-dəvləte ıştı ləvz, Xıdo doə beəvəz. Iştı çaşon bıvindo, Bəji bəbe mardəkəs. Kiy ə aspi yalisə Uzənqisə, nalisə?! Sa kərə ğıbon bəşem, Iştı dimi xolisə.