DINYO

Baxşə piyəkəsi bəştə ğoş bəka , Bebəka bə səfə de vonə dınyo . Çəş nıkoş bəqıle , çəyo pebəşe , Har vırə bəkarde vironə dınyo . Əzıniş əv konco bətı vaxt bədoy , Ki kıçdə bamande ,bə ki taxt bədoy , Qıley çi doədən bəxtəbəxt bədoy , Hejo ğəror bədoy itonə dınyo . Qa oşko, qa punhon sa daveş heste , Qa olxarteş heste , qa nəveş heste , Ruşin beyış heste , toyki beyş heste , Nə tojə bəzıne , nə kanə dınyo . Hakaynə sərəsniş çiçe çey piyey , Hejo hənək bəkaş de nozi əçey , Hiç çəş əkəniyən ıştı rozi bey , Barışte , bərıjne har xonə dınyo . Bəhram , diyə bıkə bəştə ha tonə , Çiç bəbaş , çiç bənoş iyo nışonə , Iştə şairəti ve məvə vonə Tınış ebardəni har çanə dınyo ...