POZ

Xıdo hikmət heste har fəsılədə, Pozən çı hikməton qıləy nışonə. Pozədə çı bandon munə dimədə, Hır qınedə bənə paşmə bə şonə. Həşi navış qətə dı siyo avə, Osmon sədo kardə çı roon nomi. Bənə bəştə balə qətəşe bə və, Dı voşi şıştedə roon andomi. Pəsə ğələ bənə siyə qıyozə, Rınə bə çiməni havzə sinəsə. Şulə kardedə bo çıriro nozə, Xəşəl pure vişə çı səo bə sə. Çı avəqurrəku tarsedən bandon, Hırşon qətə səyku bənə ğalxəni, Ovəyz bo sığonro suedə dandon, Zəmini çaşon ars hələ hışk bəni. Yaman ğəzəbin bə, rıkine Kaspi, Qa nıştə, qa əştə, qaən vitedə. Qemıj penıştə bə şəytoni aspi, Jəydə çı livon qıy, peşo rıtedə.