BOY BIŞƏMON BƏŞTƏ Dİ

Boy, bışəmon, çı yürdi dıl bıbu şo, Əçəy vılvon, çimənədə vıl beşo. Azən nışom, tınən nışoş, ki bışo, Çımı balə, boy, bışəmon bəştə di?! Həmə vitin, diyon mandin xərobə, Isə həni didərgine el-obə. Besoyb mandə, viron bedə çəy so-bə, Çımı balə, boy, bışəmon bəştə di! Bevətənə insoni ruj hiç bəbe, Bəsute çəy ciqər, tatə piç bəbe. Bıdə bəmı ıştə dasti, çiç bəbe? Çımı balə, boy, bışəmon bəştə di! Ğurbətədə vılən hiçə bü doydə, Sipi kardə siyo xaçi mu, doydə. İyo çəmə jimoni nərd “du” doydə, Çımı balə, boy, bışəmon bəştə di! Barzə bandon dıldard kardən de çıri, Çı şulə ov emedə de şır-şıri. Bahardemon i cılmə nun de cıri Çımı balə, boy, bışəmon bəştə di! Dınyo qıləy səhnə, jimon çəy kino, Bo kiro vəşt bedə, bo ki əv, fino. Mıs kaştedəş, ğızıl beşdə zəmino, Çımı balə, boy, bışəmon bəştə di! Tolşə bandon bo mərdonro bən məydon, Çəmə nomi hifz kardedən ə, bandon. Boy, bışəmon, əvon besoyb nımandon. Çımı balə, boy, bışəmon bəştə di! Çaşımon ni bə hiç merdi zəmini, Dast nibəje mərd bə mərdi zəmini. Şonıdəmon ıştə yurdi, zəmini, Çımı balə, boy, bışəmon bəştə di! Zəhmətinə bəkardemon hərəkət, Səvob bəbe, Xıdo bədo bərəkət. Bobo yürdi həsrətədə oməğət, Çımı balə, boy, bışəmon bəştə di! Təy bımando, bə xərobə obəşe, Çı dılono, çı yodo rə bebəşe. Okardəşe ıştə kəy bə, bə çəşe, Çımı balə, boy, bışəmon bəştə di! Bə zəmonə bovə məkə, dıdime, Bevətən çı dınyo dəvlət boçime? Sıvo bımi, çımı orzu, noc nime, Çımı balə, boy, bışəmon bəştə di!