AZ TOLIŞİM

Yolə zəhmət bəmıku, Çokə ğıymət bəmıku, Çinə sohbət bəmıku, Ağılmandə lələşim, Az tolışim, tolışim. Niməroədə mandənim, Bo har həsi handənim, Dəvo-darzən zındənim, Pokconim, çokim, xəşim: Az tolışim, tolışim. Dardi quşi bıredəm, Şin-şin votdəm, sıredəm. Bəşmə həvo pəredəm, Ranqinə kafte kəşim: Az tolışim, tolışim. Lampədəm his .bıni, Koonım nəhs əbıni. Bemı məclis əbıni, Har vərədə siprişim: Az tolışim, tolışim. Bə bandi honi ğıbon, Bə kandı şoni ğıbon, Bə dusti coni ğıbon, Bo deşmeni otəşim: Az tolışim, tolışim. Dıyoədə pemə Həşim, Tolışi vində çəşim, Çı yurdi pərə kəşim, Nili, amburi bəşim... Az tolışim, tolışim.