ZƏMONƏ VE DƏQIŞ BƏ

Dardı-xıvət omedə, Çəşədə ars emedə. Dəvlətbəkəs bəmedə, Pul bə kəsən dəvuş bə, Zəmonə ve dəqiş bə. Harki mandə yanədə, Cındo bedə hanədə. Olət koncoy tanədə? Millət fındı-firuş bə, Zəmonə ve dəqiş bə. Ki nəveədə, bekoye, Bızın, əvən çəy koye. Sənətko sənətkoye, Rəmiş hejo Rəmiş bə, Zəmonə ve dəqiş bə. Zındənim çı otəşe, Otəşi bərk qətəşe. Fatmanisə “Fatiş”e, Çimnaz xanım “Çibiş” bə, Zəmonə ve dəqiş bə. Fələk kanə çıxoye, Hıtedəni oğoye. Qasbu dınyo oxoye? Qavər hejo fınış bə? Zəmonə ve dəqiş bə. Bə dıyo şə ruy diəkə, Vıli ətrə buy diəkə. Siyasəti zuy diəkə, Pələnq tarsə həvuş bə, Zəmonə ve dəqiş bə. Çı veye ozo-bəlo. Bə ter bıqətım bolo. Əkbər, ıştı vində lo Çı do pərə, “kiş-kiş” bə, Zəmonə ve dəqiş bə.