ƏMONE, MƏQINƏN BƏ ÇIMI LEFİ

Məsəme, daştədə tufane, voşe, Ovəyzən bardedə çiç bə və beşe, Bəmı ki, qınə ni çımı hol xoşe, Şımənən məkənən zay çımı kefi Əmone, məqınən bə çımı lefi. Çok eparçınəme ıştə sə, lınqi, İşkilonku vitdəm ğırbəğ, ço lınqi, Nəbadə bəqıne tul, sığ bə lınqi, De qıləy ro, çəmi bəstem çəy həyf. Əmone, məqınən bə çımı lefi. Çımı tatə vırə petasbə tojə, Bı vırə rəsero sa curə ro şəm, Həzo kərə şat bəm, rişım petoşə, Bekardəme dılo həxi, insofi. Əmone, məqınən bə çımı lefi. Hələ tojə qətdəm bə dast həromi, Nəvedəm pəydokəm əvomi, xomi, De şinə zıvoni, de həzo çəmi, Royku bekardedəm soyədıl, sofi. Əmone, məqınən bə çımı lefi. Iştənən nəznim hiç ənə şine pul, Dəy həm podşo bedəm, həmən ki, çəy ğul, Əv bəmı zu doydə, dəy omedəm hul, Əçəy şini nıştə bə çımı rufi. Əmone, məqınən bə çımı lefi. Bəşmə sədo kardəm, ha nəfsi nokon, Çanədə təy bakan çı xəlği lokon?! Bıməsən milləti piəyon, nocon, Şodənən bə kəno vəzifə xofi. Vəse, həni, bekən səon çı lefi!