TOLIŞƏ ZIVON

Çoknə ki, əvəsor obedə səvıl, Bənə bəy tojəye tolışə zıvon. Bılbılən dı cəh-cəh kardedə şoy-şoy, Şo bedə əçəye tolışə zıvon. Əv qıləy kafteye, kəş okardedə, Dıştə pəre həmmə vale kardedə. Pərdə osmonədə, sulhi vardedə, Ozodə kijəye tolışə zıvon. Əv nozə, əv laylay, əv vəsiyyəte, Həxe, ədoləte, pokə niyyəte. Eşğe, məhəbbəte, səmimiyyəte, Şoy-şoye, sırəye tolışə zıvon. Avəsə bılınde, dardisə qone, Əv qıləy sofə ruf, əv qıləy cone. Zıvoni sıxane, qəvi zıvone, Çaş-bəve, mijəye tolışə zıvon. Hiç ki zındəni çəy tarıx çande bə, Tolış çı zıvoni soyb, xıvande bə. Əv Tolış nomədə qıləy bande bə, Tolışə vişəye tolışə zıvon. Çəmə mo zıvone, nibəbe şıdoy, Vuqar, ım zıvon əy əmonətış doy. Çı Tolış nomədə qıləy barzə doy, Ğoymə rəğ-rişəye tolışə zıvon.