TOLIŞƏ ZIVON

Çı mərdi nırrəye, çı şımşi sədo, Əzme, dəyonəte tolışə zıvon. Bəştı məsləhəti ve şukur Xıdo, - Ki, çəmə ğısməte tolışə zıvon. Əv çəmə vicdone, namus-ğıryəte, Ən yolə iftixo, yolə şehrəte. Bə hampo, dışmeni kine, nifrəte, Bə dusti hurməte tolışə zıvon. Ey aləm, ey dınyo, bızıno har kəs, Im zıvon bə dınyo oməni əbəs, Dimədə sırəye, dılədə həvəs, Mehru məhəbbəte tolışə zıvon. Jıqonə fərz bıkən əsıl insoni, Bo mo zıvoniro bədo əv coni. Bo nocins, bo befər, bo har nodoni, Ve yolə ibrəte tolışə zıvon. Tolış, bı zıvoni fər-fər diyəkə, Im şinə zıvoni yodo beməkə. Əv ğənde, şiniye, şəkəye şəkə, Zıvonon şərbəte tolışə zıvon. Bılbılən dı zevqi tolışi handə, Vıli fik bılbıli handesə mandə, Çı Vuqar nomədə tolışə bəndə, Ən yolə sərvəte tolışə zıvon.