ORƏXƏY

Həromi jəy bəştə moyə, Dılədə çok niş, orəxəy! Vəzifən beşe dasədə, Qəpı nışe, riş orəxəy! Votdəm ımən yolə darde, Təyləçəşi «dınyoş harde»! Luzış çoko danə karde, Ə dorozə qiş orəxəy! Tındə tamə de meyliybən, Purə ambon qırd təyliybən, Cəmati umi xəyliybən, Boğış şorbe, hiş orəxəy! Pori bekarde kəşədə, Eqınyəş xəlxi çəşədə! Noy ıştəni doy bəşədə, Həni sıraf biş, orəxəy! Əvotin; «Boy vəse, məkə, Həroməti dəşe bəkə!..» Sıxan ıme, bəmı diəkə; Sof nıbe dıl, viş, orəxəy! Dınyo vəyəy, dınyo yase, Çokə nomı mande, vəse! Botono ki bəməkəse? Mardiş, çoko şiş, orəxəy!