ŞIMƏ KƏDƏ RUŞNƏ HƏLƏ VƏŞDƏBE

Şəvi qıləy vaxtbe, hıtəbe ovən, Məvji hanvedəbe ruşnə astovən! Bənem beğərolim, dardon olıvən; Dılımən kəşədə çiçon kəşdəbe, Şımə kədə ruşnə hələ vəşdəbe! Bəmı əzob bıdə fəraği dojbe, Jı bızın çı dınyo oxminə rujbe! Dıli kəybonomən tobəto ojbe; Qıləy ğəm dəşdəbe, qıləy beşdəbe, Şımə kədə ruşnə hələ vəşdəbe! Suki vanqış ome, i qəvış hande, Sahət bə tık-tıkbe, nıznəme çande! Ovşumım pencəku beğərol vinde, Siyo avə peştədə əvən eşdəbe, Şımə kədə ruşnə hələ vəşdəbe! Şımə kəy ruşnəbe çə şəvi bəfo, Ə ruşnə bənəbəy vem əbi cəfo! Bənem pokə eqne, o bedə həvo; Şəv həni orəxəy, ijən maştə be, Şımə kədə ruşnə hələ vəşdəbe! Votem qavər tınən dardi xıvandiş, Bə çəş han şedəni, dı şəvi mandiş! Ahh, co baxtəvəri ısə pəvəndiş; Im xıvət, ım əzob mıni kıştəbe, Şımə kədə ruşnə hələ vəşdəbe! Şin-şini lap bevaxt hıtəbiş, kinə, Bəs kibe ənəhıt – əv ıştı inə! Xoliş cehiz vote botı iminə: Əve dorzə şəvi paşmə rıştəbe, Şımə kədə ruşnə hələ vəşdəbe!