XIYOLON ĞƏZON

Laməyədə kobəsoni vo qındə Osmon lil bə, zəmin pozi vabəka Həşi həni qədə-qədə oqındə Kəfşən ıştə zardə talo tabəka. Ləzi peştə nızım bəben siyo avon, Hır rost bəbe Dulonə ruo, voş bəvoe. Qədə-qədə dıroz bəben siyo şəvon, Bə şəvondə çəmə dılon poş bəben. Bə yod bomen qıle kinə siyo çaşon, Bə çaşondə çımı umrij ni karde... Voşi jiədə okardiədə az kəşon, Bə quş qıle sədo bome: “Dəvarde...” Tokiə kəon pencon okən cohilon, Sentyabri voşon xəbə vardedən. Voşə tılon çı mijonku etılon, Bıznən, arşiə dılon xıvət kardedən. Laməyədə kobəsoni vo qındə Ləzi bə peşt dəbəxısnien hındəmo Mamu toğə oxon vizon eqındən Tokiəçəsə qırdə bəka şinə mo. Laməyədə kobəsoni vo qındə, Bə di dəşin hamsuə kinə siprişon. Kanə cohil bəçı həmro peqındə Votdə: “Vuji vədəy bəjem bəy nışon.” Bədiə bə roy, bə dunox şə ə kinə, Im şəv qıle cohilisə şığ bəno. Çoko bəzni ,səy noyədə bə sinə- İ vaxt bome, bə sinəsə sığ bənon? Şəv dəvardə, çon okuştən kujədə, Voşə tıkon bomı lo-lo votedən. Şinə hanon hıvos kardən mijədə, Şinə arzuon çəy şə ronsə hıtedən. Pencə okə, bınışt erəx bə pozi. Çand poz bə nav çoko binim nıştəbij. Doə bınondə tı bı şəvon dırozi, Larze-larze mıni coyli haştəbij. Esə pozim...kobəsono vo vardəm, Evoy bə so, bıdə bə voy ə eşği. Həni pozim...donku livon ekardəm, Həni pozim...livə-ğəzim,az hışk bim...