ZINDƏNİM

Çı dınyoku rə-rə si biş, Astovə biş, çı rə eşiş? Omdəm bə kə, vindəm tı niş, Votdən, çı kəy roy zındənim. Bətı damiy, çıç tan əkəyş. «Mamu» əbiş – kılo səkəyş. Bı soədə hənək əkəyş, Az həmunə soy zındənim. Tı ıştən şiş, nomı mandə, In dard çımı dıli kandə. Xavər şəv-ruj hejo bəmdə, Bəy dılvandi doy zındənim. Fələk bəmı kardışe ğəsd, Bo şoy nəvəym, dard oməy rast. Nunə cılmə qətdəm bə dast, Bə yod omdəş, hay zındənim. Yol bedəbiş ve de nozi, Kijon romdəbiş de vezi. Xıdo bəştı şe be rozi, Mı ıştənə, ray zındənim. Çımı kəj ki karde vılo? Yalov beşdə çımı dılo. Çıko oməy ın dard-bəlo? Əlolə, loy-loy zındənim. Mais, məvot, tikəy nəvəy, Betı nəvəy, dılış təvəy. Konco koyəy, konco vəyəy? Mı yasədəm, şoy zındənim.