SƏNQƏRƏ BAND

Sənqərə band, ijən etə diyanon, İtkə bə yod cıvonəti biyamon!.. Keve çımı dıli tağәt, ə damon? Hele bıkam, və obəka boməybu? Çımı təki dardiko əv səməybu?.. Sənqərə band, ıştı ğalə dılədə, Ə xosə çi bəmı şinə məç ədəy.. Həyf, ısət ni... Ləzzət əbiy bəvədə, Pokə ovon dılanko əv dənıştiy, Isnə çımı zurbandisə ənıştiy... Sənqərə band, dılım sutə, qardo bəm, Əy vindero yolə ruysə pardo bəm... Xıfətiko bənə vıli zardo bəm, Yəne ijən rast boməmon bəyədı? Vəşəy – vəşəy ov bəbemon dəyədı?.. Sənqərə band, az ğəm vitə percinim, Ğısmətnıbə savdo qınyə perçinim... Xıfət dıli pinəy, çoknə oçınım? Bə yod biyə vıl – vənəşan əçınim, Bəçəy xosə muəxolon dəçınim... Sənqərə band, kulə ruji oməybən, Mandə çəmə kəy peştiko, bəməybən... Çəy arsiko Mambuzizə beməybən, Çəşım kuybən, vindəm ni, əv beşə şə, Bəçəy qorə bəçmı dıli zil eşə!.. Sənqərə band, ovə qulə dəqardə, Ve çokə ruj çimı umro dəvardə. İbrahimi həşi nıştə, eqardə, Ğurubədəm, çətin yəndı bıvindam, Boy və okam, dıl – dılisə səğandam!..