Dilbərım, boy çiç bəbe, dınyom bıdə vılvon bıbi…

Dilbərım, boy çiç bəbe, dınyom bıdə vılvon bıbi, Bılbılon nəğmon bahandin şiveyi – rizvon bıbi. Dınyo votdə boy demı həmrəy bıbu, əncəx ki, mı, Das peqətnim ışdıku, aləm demı deşmon bıbi. Naləvu fəryod bəkam har şəv az ışdı dardiku, Əndə vaveyla bəkam ki, ın conım bicon bıbi. Haci Mina bandədə pəs kışdəbu, con doydəni, Azsə сon doydəm, bədom berdən çımı haft con bıbi. Vəsli – yari qorşoğ aşığ dust bəbe de dardinə, Rənci – eşği – yar bəbe aşığonro şon bıbi. Beəziyyət bıə ğəzənci ğədri nəznə hiç odəm, Bın səbəb bo aşığon hejjo bəbe hicron bıbi. Dıl, bıqət çe Əhmədi – Muxtari roy, me’rac bıkə, Osmonon heyron bımandin, tı şəhi – osmon bıbi. Zahidon zikri – Xıdo kardən guya, bəs zındənin, İnsoni, dıldəş Xıdo, zikriş Şəhi – Mərdon bıbi. Nodonon eşd-nışd məkə Bandoj,bəbeş nodon tınən, Nışdemon kardəş, bıkə de arifon, inson bıbi.