ƏVƏSOR OMƏ

Əvəsore, beşe zomson, Xolı-xıçə bə huş omə. Dust bin ijən bəd bəkəson, Idə ruji qardış omə. Lonə bastdən pərisqılon, Qılə jəydə mujnə hılon. Kandımuzon, bızanq-fılon, Bə con omə, sədoş omə. Luləpəri obe çəşon, Bə koş dənə çitə kəşon. Pəre-nışde bə doy bəşon, Pustinkəşi vuş-vuş omə. Zizə kardə ambu, əyu, Jığo zındəş omə vəyu. Dimə sipi, kardə həyo, Voy rast karde, həyoş omə. Doy bekardə həzo zıvon, Həşi ruşnə lıştən əvon. Ğarzıxomon əmə bəvon, Kəkku sədo bə quş omə. Rəsə vılon obe zəmon, Çəmə dılon şo be zəmon, Dard-dıliku co be zəmon, Bılbılonən bə cuş omə. Aləf rostbe bə səy təpə, Qınye vavaz, jəydə ləpə, Çəmə molon ənə kok bə, Şoyvo kardən ın ruj omə. Sı-sı doydə kaqon pipik, Moğnə noyo kardən şik-şik, Parçinonsə handedə suk, Xomə verə vey xoş omə.