BOÇİŞ JIQO KARDƏ, DINYO

Moə mardə, balə yətim, Az ım zulmi penəğətim, Balə be mo onəğətim, Boçiş jıqo kardə, dınyo? Xəyni çaşmə səvon nəbi, Hələ şedəş deştə dəbi, Dıtımexo, damə bıbi, Boçiş jıqo kardə, dınyo? Hey qardedəş, mandedəniş, Pevatdəniş, zandedəniş, Bə səğri ğəyd mandedəniş, Boçiş jıqo kardə, dınyo? Har kəsi nun Xıdoy co ka, Bo penc kəsi məydon oka, Bə fəğıri dardı bo ka, Boçiş jıqo kardə, dınyo? Çəkuç jəydəş tı bə nali, Im hali jəydəş bə hali, Oxoy bəmandeş tı cayli, Boçiş jıqo kardə, dınyo? Ru heste, səpe pardış ni, Odəm heste, çəy hardeş ni, Əv kiye ki, çəy dardış ni, Boçiş jıqo kardə, dınyo? Kanədevran məydonədəy, Nəfəs səydə, çəy conədəy, Çı bəşəri mərdonədəy, Boçiş jıqo kardə, dınyo?