IŞTI ĞƏLƏM ĞIZILE

Az handedəm ıştı «Dıli ğısməti», Omütedəm tolşiədə şeriyyəti. Zındəm ıştı hınə, ıştı ğıryəti, Rafiq Murad ıştı tono əğıle Iştı ğələm ğızılebən, ğızıle. Eçındəş, bo kardəş xəyri bə şəri Aşığim az bəştı nıvıştə şeri. Bə yod vardəş çəmə süə moy, süə zeri Iştı sinə püre, sıxanı bole, Iştı ğələm ğızılebən ğızıle. Nıvıştedəş çı Arçoni honiko, Sehbət kardəş bılbıliko, vıliko. Bekardedəş tiә tı çımı dıliko Ki bə xoş ni, çəy dıl düz ni, dəğıle, Iştı ğələm ğızılebən ğızıle. Xəbə dodəş Ostoroko, Boküko Haco votdəş zerəniko, loküko, Kəmənd ğandəş de çı bandi tıkiko Şerən bıbü, ım ve şinə nəğıle, Iştı ğələm ğızılebən, ğızıle. Zulfuqari tərif karde-karde tı Bə kanə rü tojə ovəyz varde tı. Çımı səyko çımı ağlı barde tı Iştı tono, bızın, bılbılən lole, Iştı ğələm ğızılebən ğızıle. Az şair nim, şairtəbiət odəmim, Bə üstodi votəy hələ mıhtocim. Iştı şeron bəmı həbin, məlhəmin Əve votdəm, Əhəd çəmə bılbıle, Əhəd Moxtar, ıştı ğələm ğızıle.