MORƏ-MUŞUN İCLOS

Kıtı rə-rə vaştedəbe Moron qətdə, kıştedəbe, Kıştə moron hardəbe ha, Boştəno kef kardəbe ha. İ ruj moron cəm oməyn, Xıyoldə bə çəm oməyn Votşone bəs, çiç bıkəmon, Kıtıon hiç-puç bıkəmon?! Harki pebe ve qəpış jəy, Qah sərosti, qah çəpış jəy... Kəsi vote ”bıtosnəmon, Kom ruyədə etosnəmon!” Kəsi vote, ” bısutəmon, Tənuyədə osutəmon” “Səpe livə oğandəmon, Kıtı bə çol eğandəmon!” Duz i sahat cəhlışon kay, Oxoy oqınin, səhlışon kay... İqlən morə – ə sipiriş, Vote, ” lozim ni hiç təşviş, Boy kıtı səğ bahaştəmon, Bəçəy qıy zanq ehaştəmon. Sədo be, rəy bəvitemon, Bəştə hıl ebəvitemon!” Muşon həməy dastkə kuyəy, Votşone ha “Afərin!”, bəy. Pebe iqlən lodə morə, Lap həməysə qədə morə: Votşe ”bıməso har kəs, Zanqi ki ehaşto bəs?” Muş-moron “kə kumə” be, Hiç ki nıznəy damə be!..