IN DINYO KO ÇOKNƏ BƏBE

Şəyton oməy vaşte-vaşte, Boçi çəy lınqı narışte? Məsdəm, ijən kışte-kıştey In dınyo ko çoknə bəbe? Şə əv çı Şiri vəş qətə, Şiri ğeyziku vəş qətə. Morə bə qəv otəş qətə; In dınyo ko çoknə bəbe? Həvuş həməysə ğoym vite, Kəsi rə şe, vırəş qəte. Həxi sədə kıloş sute; In dınyo ko çoknə bəbe? Ha bovnedə əv əməni, Tov vardəni dılım həni! Çəy çəşədə ars beşdəni... In dınyo ko çoknə bəbe? Har hurmətış, zuş pulədəy, Rəğı-rişəş ustulədəy. Zolım-zındıx çı koy sədəy... In dınyo ko çoknə bəbe? Porı oməy, okardə kəş? Az pəryədə moğnədə bəş! Tınən bəmı “pit” votedəş?.. In dınyo ko çoknə bəbe? Dızd mandə çı dızdi peştdə, Tavzı vaştdə, sıvık kəşdə. Exırçındə har kəs boştə... In dınyo ko çoknə bəbe? Ağlış heste, zınəş heste, Har roy-riyə zınəkəse. Votedən bəy korə pəse!.. In dınyo ko çoknə bəbe? Noduz oməy, rosti kiye? Rə pesyəkəs nozıkiye! Əmə nıznəy həx dekiye?!.. In dınyo ko çoknə bəbe? Çanə bəbe Həxi haste? Xunxari ko xun bəbaste! Voteş: vəse, qınom heste?.. In dınyo ko çoknə bəbe? Dışmen yaman zumande ha! Çəş bıkənən iyəndı ha! Məhol qınyə bəyəndı ha! In dınyo ko çoknə bəbe?