ŞİNƏ BO

Məqınən tolışi bə nərə zoon, Çımı con ğırbone bə mərdə boon. Bıdənən dastbədast, bıkən ve koon, Nıqardo səyku siyo ço, şinə bo. Mənəvən yəndıku hiç co, şinə bo. Coni ğırbon bıkənən bəştə eli, Məçınən co boğədə kaştə vıli. Pu bıkən bo vəşero bəştə zili, Məkənən yəndıku hiç ğo, şinə bo, Mənəvən yəndıku hiç co, şinə bo. Maç bıkən ıştə zəmini, ço bıbən, Ehaştən yolə xıçə, xol do bıbən. Bıməsən şoyə xəbon, şoy-şo bıkən, Bışənən de həxi şə ro, şinə bo, Mənəvən yəndıku hiç co, şinə bo. Bıjənən bəştə kuli qonə şələ, Mədənən ıştə nuni hiç bə kulə. Vamədən şəytoni aspi bə dılə, Koməq bıbu bəşmə Xıdo, şinə bo, Mənəvən yəndıku hiç co, şinə bo.