ƏQLƏ ÇƏŞIM BƏMEDƏBE

Əvım vinde bim beğərol, Hiç nımande dılədəm hol! Çırəğban be həmmə məhol; Bənəy həşi pemedəbe! Dıqlə huri çəy yanədə, Vindəm nıbe hiç hanədə! Vəyə libos çəy tanədə; Sə şol bəy ve damedəbe. Pıye-pıye kardəbe noz, Əvəsorbe, jo bızın poz! Kinon beşin bəçəy pışvoz, Bəvon ğolloğ hamedəbe. Qıləy bılbıl divonə ve, Ətrə buyku məstonə be! Sə vıli eşğ bəy vonə be, Əçəy qırdo çamedəbe. Hiç şo nıbim az xandiku, Qəvım tel be çəy ğəndiku! Bəmı kardə rışxəndiku, Arşiə dılım rəmedəbe! Fitnə çəşon mijə vaşte, Hiç bəmındəş conış haşte? Vırəş nıbe bo ox kaşte; Sımı sinə romedəbe! Jəşbe bəmı eşği otəş, Sutə conım bəy ələtəş! Sıredəbe qah iqlə çəş, Əqlə çəşım bəmedəbe!