DILIM BEĞƏROLE, LONƏ RƏSTƏNİ

Dim bənəy ovşumi – çordə şəvəbe, Siyo xol qıləy şor, voədə nəvəbe! Mu jığo toykibe, jıbzın şıvəbe, Bənem muəxoldə şonə rəstəni! Dılım botı təşnə, çoknəy si bıkəm? Xırtədəm ım ğıbo çoknəy ni bıkəm? Az betı zındənim konco ji bıkəm; Dılım beğərole, lonə rəstəni! Vem pidə ə lonə muəxol bıbu, Dılım ətrə buyku lap behol bıbu, Zıvon qəp nıjəno, qəvdə lol bıbu, Çanə fikir kardəm, vonə rəstəni! Zındəş, Ruşin qıləy tənıkə dıle, Əv ıştı eşğədə handə bılbıle! Lap telə sıxanən bəyo məğbule; Hakənəy şin bıvot – ”conə” rəstəni! Votdən həyat ıştən şinə dancəye, Çı har kəsi baxşə anqı zıncəye! Oməmon bə dınyo, qıləy pencəye, Fikim doy, çand qılə xonə rəstəni! De dınyo zərfəti kardemon pidə, İnsoni qujdiyən hardemon pidə, Bərkə ruj omedə, mardemon pidə, Məğami vaxtədə hınə rəstəni! Dınyo hərco-mərce, tavzı kəşdəni, Ezemi nəm kəşə, otəş vəşdəni, Çiçimon kaşdəbe, əvən beşdəni, Bo peşo kaşdeyən donə rəstəni! Şəytonən ısət bə lap nezə həmro, Dəmə bə hənəke əv çəmə umro. Hilim jəy zuypuri, pəre diyəro, Hənəki nıqəte, konə rəstəni!