Boy, məqın bəçmı dıli, şairi dıl name bedə…
Boy, məqın bəçmı dıli, şairi dıl name bedə,
Bıbo hicroni əsir, iqlə vəşə şame bedə.
Aşiğon deştə niqori həmə şon, az ğəmədəm,
Ki bə vəsli bırəso, dardı ğəmış kame bedə.
Səydə dıldo mıku dıl, dıl sutə dardon doydə,
Roste ım qəp, votedən, eşği vıjor qame bedə.
Çəş məkən aşiğiku məntığinə, ağlinə ko,
Çəy fiki bardə bitov eşğ, befik-fame bedə.
Lovə kardə ujən Azər bətı, ey nozinə yo,
«Boy, məqın bəçmı dıli, şairi dıl name bedə»
Sources
Anthology of Talysh poetry (2021), 416. ISBN 978-9952-28-569-7.