DARD

Xıdo, tıniş petono həx, Çıki sıftəy, çıki orəx. Tərsə qardə fələqi çəx, Im çı yolə darde, Xıdo? Boğonədə bar bedəni, Kardə ğəzənc var bedəni. Dışmen boçi xar bedəni? Im çı yolə darde, Xıdo? Dard omedə bə har dəğə, Con beşedə reğə-reğə. Nodonon bən çəmə əğə, Im çı yolə darde, Xıdo? Penə sədə nıştdə məlo, Sı-sı doydə bənə dəlo. Oqardə bə yolə bəlo! Im çı yolə darde, Xıdo? Dasto Ğıron, çəşdə dəğıl, Dini hisob kardən nəğıl, Milləti dast çığıl-çığıl... Im çı yolə darde, Xıdo? Saxtə moğnon ısə lə bən, Neqon ğətı, aspon hə bən. Sutə dılon həmə sə bən, Im çı yolə darde, Xıdo? Nohəx hiç kəsi zındəni, Həxən ku bə, ro vindəni. Insof-ədolət mandəni, Im çı yolə darde, Xıdo?