XILƏ KITI HƏXƏDƏ BALLADA

Har ruj dəy əkəyn nozə, Bəçəy qi dənəyn qyozə, Ənıştin, əhıtin dəy, Əhandin, əvotin bəy: – Ha çəmə yolə kıtı, Ranqinə xılə kıtı. Çamedəş çəmə kədə. Həmə kəs rohət bedə. Təblarzo əsərən ni. Xunədə fişarən ni. Ha çəmə yolə kıtı, Şələdum, xılə kıtı... * Tojə vəyu omeyku, Bukə qətışe çəyku... Nəhaştışe nez-kəno, Kıtı mande bıtono. * Çə rujiku besoyb be, Bəbol çı so-bə so be. Xandəxəson, kımıton, Zibilxonon, şikaston Ənəvi –hard pəydokəy, Iştə luzi si bıkəy... * Xıdoku bəy ayətbe, Xılə kıtı adətbe: Ha sor se-ço əzandi, Bə di kəon əvğandi... * Har kəo rostbe şivən. Bə dod oməy məhəllə: – Nom beşə lo-kəjələ, Kıtı qıləy bəloybən, So-bədə kijə həni Bo əmə hiç mandəni! Hay qıləy çu peqətən, Xılə kıtı bıkıştən! * Əy odəmon, bımandən! Bəlo kaştone ıştən! Kədə kıtı neməte, Çəmə kə-bəy oqəte! Iştə sufrə eməyon, Bəy bıdon, vəse bəyo! Təki bəy xıvand beşən, Əçəy ğayğu bıkəşən!