MƏYDON ÇƏMƏ MƏYDONE HA

Fəğri koye nımoj vote, Vəşi mande, rujə qəte, Çəmə koye harde, hıte, Məydon çəmə məydone ha. Bə səğri ğeyd mandənimon, Kosib, fəğır zındənimon, Bı koədə əmə nimon, Məydon çəmə məydone ha. Əmə kəbob hardeədə, Kosib vəşi mardeədə, Devr tərsə qardeədə, Məydon çəmə məydone ha. Nunmon heste, pulmon heste, Mizi səpe vılmon heste, Çəmə xəşə dılmon heste, Məydon çəmə məydone ha. Pul cifədə, ağıl sədə, Nəvedəmon ıştə kədə, Dınyoən penc ruje, dədə, Məydon çəmə məydone ha. Bəməro ni şum jəy, kaşte, Ğızıl heste, çəmə peşte, Im dınyo bəməro vəşte, Məydon çəmə məydone ha. Kanədevran canqe karde, Əv məydoni tanqe kardə, Əcəliko vanqe kardə, Məydon çəmə məydone ha.