BEŞE

De umiyon kardımone kaştıqıl, Dast-poçəmon zəhmətiku jəy çığıl, Gerqıluli, vələmiri jəşe ğıl, Kaştıkori zardi qıne, qer beşe, Don bə çinə, sicım tıvol-ter beşe. Toni bande, toni boğe, bustone, Toni havze, toni sutə, tovsone, Nıso zınə zəminımon, doştmone, Bo çəmə eğvoli əvən ker beşe. Don bə çinə, sicım tıvol-ter beşe. Dardi bıdə Xıdo doəşe çəy dəvo, Mardə besə vadoş, bebəşe ğəvo, Kuy dı çaşış piyəy, əncəxən çəvo Qıləy rostış vinde, qıləy her beşe, Don bə çinə, sicım tıvol-ter beşe. Im zəmonə mışt zındəni manqulo, Hest osmono eşəkəs çı zambulo, Bə əyumon ğələmmon jəy dambulo, Rəğış i, rişəş i, mivəj ser beşe, Don bə çinə, sicım tıvol-ter beşe. Hesti vion bə lonə rost nibəşən, Nibəzınen huşə bə ji kıləşən, Qılfəku bə hıl dəşə pizə puşən Beşeədə rost benışe, per beşe, Don bə çinə, sicım tıvol-ter beşe.