SULEYMON İYƏN PƏRƏ XOLÇƏ

Votedən i ruj Həzrət Suleymon, Penışte bə xolçə rost be bə osmon. Pərə xolçə səpe bə barzi pərəy, Bəştə hukum kardə vıron erəxəy. Osmono seyr karde-karde votışe: «Çımı har sıxani ğudrət hestışe. Bə çiçi ğadirim, har kəs zınedə, Har ko, har çi çımı dasto omedə. Bə həşi bıvotom beşi, bebəşe, Bə avə bıvotom eşi, ebəşe. Aləmi har məxluğ bəmı jəydə sə, Azim çı zəmini soyb, xıvand ısə.» Xolçə iberdəmə şat be itonə, Jo bızın nəvdəbən bo qıləy vonə. Kam mande eqıno bə zəmin Həzrət, Nimədə bımando əçəy səyohət. Votışe: «Im çiçe, boçi bedəş şat? Əmr kardəm bətı, bımand fərəğat!» Xolçə məsəşe, tikəyən şat be, Həzrət xolçə səpe itonə ğat be. Xolçə bə Həzrəti votışe: «Bıməs, Çok bəbe tı ıştə fiki pok bıkəş. Əslədə tı ıştən duz bıbi, şatiş, Duz bəbəyş, har çi soyb azim, nəvotiş.» Suleymon dərəsəy xolçə sıxanon, Onıbe qəp jəyro Həzrəti zıvon. Hiç vaxt «azim-azim» məvot, ey inson, Bəpe çı insoni pok bıbo vicdon. Hejo co kəsiko nəvencəğ qıno, Fik bıkə, kardedəş ıştən çı xəto.