ESƏT ZƏMİN KAŞTƏKƏS

Conbəsə boş anqulisə vaştəkəs, İm zəmini zımsonədə kaştəkəs! Poz dəşedə, poçə bəpe kardedəş, Sıli, zıli, pəyni bə so vardedəş, Ozo çiçe? Tı bo puli mardedəş! Iştəni, əğıli, jeni kıştəkəs, Conbəsə boş, esət zəmin kaştəkəs! Çı ro beməşi, de Xıdo canq məkə, Yanvarədə çəmə quşi danq məkə, Şəxtə jəşe, həni Xıdo vanq məkə, Deştə de kon boştə bəlo rıştəkəs, Conbəsə boş, esət zəmin kaştəkəs! Arserid, xomesin, senap, redamil, Dəçəy təsiri çan kəson bən zəlil, Çı qıno soybe luzdəki ə tifil? Cəvob bıdə, korpə luzdə bıştəkəs! Conbəsə boş, esət zəmin kaştəkəs! Çan toni səlyərkə sutə, zındəniş, Bətı dıçobə mərəzi vindəniş. Arserid zəhərey! Qəzet handəniş? De dəvon ıştən bəştə lov nıştəkəs, Conbəsə boş, esət zəmin kaştəkəs! Şəxtə ome, bı tərəfon dəvəte, Jə təğonı çı zəmino pevate. Fırsətı be, zyodə qılon həvate. Bə təği yonqo, lefi pepuştəkəs! Conbəsə boş, esət zəmin kaştəkəs! Əmon bıdən, bıdə əvəsor bubu, Bə zəmini rahan bo, boxor bubu, Im ıştı oxonə kaştə sor bubu! Rohat bəbe in şeri nıvıştəkəs, Conbəsə boş, esət zəmin kaştəkəs!