ŞƏHİDİ MOƏ HAN

Moə votdə, ha balə, Oməm ıştı toniku. Bəşt bışəmon, çəş kardəm. Pemandəm ıştı səyku. Hiç ruj nıvində baləm, Çı sinı hesbe ki, şiş? Bəmedə boto aləm, Ənə diyəro ço şiş? Balə votdə: şinə mo, Tı çəşə ars eməkə. Mı şəhid bıəm, rufım şo, Iştə dıli şo bıkə. Çımı vırə rohəte, Ço votdəş norəhəte? Şəhidi vırə vəşte, Bomıro xıvət məkə. Moə votdə: ha balə Konco mandiş, boy beşi. Çiç bəbe, tı i kərə, Boy bəçımı han dəşi. Jiye zındənim betı, Sedəbim nəfəs detı, Çoknə bovotom bətı? Mıku diyəro məşi. Balə votdə: şinə mo, Çəş məkə həni mıni, Mı şim, onibəqardem, Məkışt bomo ıştəni. Iştə səy tı dik oğət, Bomıro yas oməğət, Xıyzon bətı əmonət, Noğo bıdə ıştəni. Moə votdə: ha balə, Əğıl tıni bə çəşe. Şəv-ruj bəmı votedə, Keynə bome bebəşe? Çoknə bovotom az bey? Əv həni şe, nibome. Çoknə bəsə dənəm ey? Iştı pıə şəhid be. Balə votdə: şinə mo, Hələ bey hiçi məvot. Korpəye, ve bəbəme, Xıdmətədəy tı bovot. Bıdə əğıl bəştə bo, Hələ tikey yol bıbu, Şinə zıvonış obu, Çəğınədəy tı bovot. Moə votdə: ha balə, Arşiyey kəş-poçonım. Boto kəşedəm nolə, Tikə-tikə be conım. Şəv-ruj lovəm bə Xıdo, Çımı coni bıstəno. Həni mande zındənim, Bıdə bom ıştı tono.