DU BIVOT BƏMI

(mənsur şeir) Du bıvot bəmı... Bıvot ki, tınım ve pidə, Jığo bızın çımı çəş nibən – Qordındəm az əvi bəştı nomi sə, Tıni çəş nıbən. Du bıvot bəmı... Bıvot: be ıştı çımı şinə han Qıləy telə çaye şəvi qəvədə. İ kərə şin-şini bə çımı han boy, Demınə bəsıre şəvən bəvədə. Du bıvot bəmı... Bıvot: tı bə dınyo oməy, Ha ruj tınım çəşım kay. Iştı sədom məsəy, Az çəşım okay... Du bıvot bəmı... Bıvot: çımı astovəş, Tıni nazbalışi oso Noydəm ıştə səy jiyo az. Çand vaxte dılım omedəni rostkəm Iştə nazbalışi az. Iştə səy muy ha şəv az Iştı səpe ekardəm – Tıni hiç ki nıvindo. Du bıvot bəmı... Bıvot ki, nibəmardeş, dınyo Do bəbeş... Eh...bıdə odəmon Əzroyili nozi çəş bıkən ...Əğəm tı mardişən...tıni şıştero Odəmon məcburin pozi çəş bıkən... Du bıvot bəmı...