ODƏM NİBƏBE

Isə omə vəşyəni coyli bımand tokiədə, Cəvə ordə bıdə kue, ləzzət bobə lukuədə. Çanə odəm eqınyə bə kuçəsə Bokuədə. Ziqqə bıjən vəşiku hiçki iyo cəm nibəbe, Odəmi odəm nıbo, odəmdə odəm nibəbe. Harki kardə cohləti pemandedə kuçono, Jıqo kəşdə kazbeki, zu mandedəni cono. Sərbozətiku vitdə şanqo hıtedə bono, Hukməti ğıryət bıbo, vətəndo ğəm nibəbe. Odəmi odəm nıbo, odəm odəm nibəbe. Harkəs ısə əştedə merdətiku dəm jedə, Iştə çəşon vi kardə, nıvindımə qəm jedə. Şedə hıtdə sahədə, boği kəno ləm jedə. Votdə: hejo hanvedəm, hiç oğoə səm nibəbe, Odəmi odəm nıbo, odəm odəm nibəbe. Xuqi pusti dınyoədə pozi həşi tat bəka, Kosib çı kosibi şəy obəkırne- lat bəka. Peəçın həmişə boştə ıştə koon şat bəka, Həmə boştə maşin sə, çımıku həm nibəbe, Odəmi odəm nıbo, odəm odəm nibəbe. Va ki jəşe, şəxtə be, vəziyəti hiç bəka, Bepuləti vəşyəni xəşə dıli puç bəka, Seqlə devalvasiyə lap odəmi luç bəka, Çoştə iqlə nun bəhom, şanqo ordəm nibəbe, Odəmi odəm nıbo, odəm odəm nibəbe. Şair İlqar ve votdə, odəm heste məsdəni, Ve odəmi ağlış ni, ımoni dərəsdəni. Anə bəy umur doydən bə ıştəni rəsdəni, De dumlışti bıjiyoş umuri təm nibəbe, Odəmi odəm nıbo, odəm odəm nibəbe.