BƏHRİ- TƏVİL

Çiç bıkəmon, çiç nıkəmon? Hest-bəyon hiç bıkəmon? Həlolə tumi bic bıkəmon? Iştəni iflic bıkəmon? Ağılmandi qic bıkəmon? Umri jıqo puç bıkəmon? Yurdi yəni kuç bıkəmon? Çiç bıkəmon, çiç nıkəmon? Votdəbimon el i bəbe, – fik i bəbe, zil i bəbe -zik i bəbe, dıl i bəbe -vek i bəbe, tel i bəbe, -şin i bəbe, xol i bəbe -şiv i bəbe, pul i bəbe -cif i bəbe. Votdəbimon. Lut ki bəbe -tuz ki bəbe? Hırs ki bəbe -muz ki bəbe? Şat ki bəbe -duz ki bəbe? Yad ki bəbe -dust ki bəbe, lu ki bəbe, pust ki bəbe? Votdəbimon hul əbıni, ğul əbıni, ruşnə ovon lil əbıni, canqımon ustul əbıni. Votdəbimon ım votəyon zinə bəbe, pəynə bəbe -şambə bəbe, əynə bəbe -diynə bəbe, rəynə bəbe? Kəynə bəbe, kəynə bəbe? Desbə oxoy məynə bəbe? Vay dədə vay, vay nənə vay, haydi bıjən, haydi məjən, heste ujən bəçəmə kujən dərvəkəson, handəkəson, heste ujən çandəkəson, ji poədə mandəkəson, təyliyə nun hardəkəson, ranqəpəron, zardəkəson, vəşşinəku mardəkəson, hestemiyon qardəkəson, milləti xəy bardəkəson, piy dılədə qardəkəson, ruji bə siyo vardəkəson, hest bə çaşon pardəkəşon, şəytoni roy pard əkəşon. Çiç bıkəmon, çiç nıkəmon? Vəkilxonə hıranqone, kardedə soklə canqone, ujən ğıyomə manqone, hələm ki danqo-danqoney, hələm ki lanqo-lanqone, şəyton bə məşqe şanqone, dınyoş qətə dıvənqone. Rost bə doron, pur bə toron, kanə soron mandə koron, rışvəxoron, vızmə zoron, dızdə xoron handə “Ğıron”... Çiç bıkəmon, çiç nıkəmon? Həlolə tumi bic bıkəmon ? Iştəni iflic bıkəmon? Hestebəyon hiç bıkəmon? Ağılmandi qic bıkəmon? Umri jıqo puç bıkəmon? Yurdo yəni kuç bıkəmon? Ha bə dimi zard əkəşon, sardə kədə sard əkəşon, bə maştənə pard əkəşon, milləti ha dard əkəşon, səbrım peşe, ənqım beşe, vanqım eşe, çiç bikəmon, çiç nıkəmon? Çiç bıkəmoon?