ƏLOLON

Boğı-boğçəm vıl bəbe, Xəy-bərəkət bol bəbe. Dışmen mıni vindədə, Tarsiku behol bəbe. Çımı nom Əliheydər, Zıkrım “Allahu əkbər!” Yol bəbem dastdə “Ğıron”, Vırəmən bəbe minbər. De şonə sə randedən, Boyəndı çol kandedən. Isə sukon mandedən, Kaqon-veron handedən. Vıl dılədə- bitondə, Vıl vıle Velbutundə, Tı həməysə ğəşənqiş, Vılon vıliş butondə! Ha xosə çəmə bandon, Mandon kəm-kəmə, bandon. Ədalət deştə dardon Mehmone bəşmə, bandon. Ro omdə Ulumiku, Pındə vişon kəmiku. Cəmati peşt kutinbə, Məmuron zulumiku. Az votedəm sə bə sə, Bandon mandən səbəsə. Dard omə de ləşkəri, Sutə dılım sə bıə sə! Bəştı har sıxani con Bəvotem, ha çımı con. Bəmı qıləy “ha” bıvot, Bıkəm ın coni ğıbon. Sinəm sutdə, doğ bedə, Yarəm bəmı doj dodə. Vətəni həsrətiku Dıl-ciqəm sim vardedə. Boğçə çımı, boğ çımı, Yo mandə iroğ çımı. Xəyri co kəs vindedə, Dılım bedə doğ çımı.